Un ano máis a Fundación Caixa Rural Galega Tomás Notario Vacas acaba de facer pública a terceira edición das bolsas para estudos de posgrao.

En concreto convócanse dúas bolsas cun límite máximo de dotación de 40.000 euros cada unha para o estudo dun máster nunha universidade nacional ou estranxeira. A bolsa utilizarase para cubrir gastos de inscrición e aloxamento. O monto final dependerá da localización, o centro e o programa do máster.

Para poder optar a algunha das bolsas, os solicitantes deberán ter un título universitario, ter vinculación con Galicia e poderán ser estudantes recentemente licenciados ou profesionais que xa estean a traballar na actualidade. Entre as súas prioridades iniciais está a convocatoria de bolsas para a realización dun máster coa finalidade de formar a profesionais nos centros máis vangardistas co propósito de que poidan achegar coñecemento ao tecido industrial galego.

A selección dos bolseiros basearase en criterios como a formación académica previa do solicitante, a traxectoria profesional, no caso de que exista e o proxecto de estudos a realizar, así como a súa aplicación posterior prevista.

Actualmente o prazo de solicitude estará aberto ata o 31 de maio e as solicitudes do mesmo xeito que as bases desta convocatoria poderán atoparse na nosa páxina web www.fundacioncruralnotario.gal no apartado de convocatorias.