A Fundación Caixa Rural Galega Tomás Notario Vacas lanza un curso gratuíto de Intelixencia Artificial aberto a toda a cidadanía
26/09/2025
A Fundación Caixa Rural Galega Tomás Notario Vacas concede tres novas bolsas internacionais de posgrao na súa V Edición
A V Edición do programa permitirá a Celia Durán Iglesias, Paula Mariño Faro e Roy Casero Soler continuar a súa formación especializada en universidades de referencia de Francia e Países Baixos
A Fundación Caixa Rural Galega Tomás Notario Vacas fixo entrega das Becas de Posgrao 2026, correspondentes á V Edición do seu programa de bolsas internacionais, destinadas a apoiar a formación de mozos galegos en universidades de referencia europeas.
Nesta quinta edición, o Padroado concedeu tres bolsas internacionais a mozos graduados da Universidade de Santiago de Compostela (USC), procedentes dos ámbitos de Veterinaria e Bioquímica, que continuarán a súa formación especializada en universidades europeas de referencia de Francia e Países Baixos.
Os tres novos bolseiros son Celia Durán Iglesias, Paula Mariño Faro e Roy Casero Soler.
O acto de entrega das bolsas tivo lugar na Sala de Consello da Planta 1 da sede central da Fundación, situada na rúa Montero Ríos 24-26, de Lugo.
Durante o acto, o vicepresidente da Fundación Caixa Rural Galega Tomás Notario Vacas e presidente de Caixa Rural Galega, Manuel Varela López, animou os tres novos bolseiros a aproveitar a súa estancia en Europa para ir máis alá da formación académica.
“Viaxade para escoitar e descubrir outras culturas”
Varela López animounos así a viaxar tamén para escoitar, descubrir outras culturas e regresar co desexo de poñer todo ese coñecemento ao servizo da nosa terra e da nosa xente.
O encontro tivo ademais un compoñente especialmente emotivo ao coincidir coa proximidade da celebración do centenario de Tomás Notario Vacas, presidente da Fundación.
Con esta nova edición, a Fundación Caixa Rural Galega Tomás Notario Vacas continúa co seu compromiso co talento novo e coa formación internacional dos mozos galegos, facilitando o acceso a novas oportunidades de especialización en universidades europeas.
