Nun acto de presentación do convenio na sede central de Caixa Rural Galega en Lugo, o reitor da USC D.Antonio López Díaz, o vicerreitor de organización académica e do campus de Lugo D. Francisco J. Fraga López e o vicepresidente da Fundación D. Manuel Varela López, xunto a outros membros do padroado congratuláronse pola renovación do acordo de colaboración que permite incrementar a capacidade da USC para dotarse de persoal investigador, así como facilitar a licenciados a posibilidade de realizar unha actividade investigadora remunerada que permita así mesmo a obtención dun título de doutoramento.

O obxectivo da colaboración de ambas institucións é o de contribuír á promoción e mellora da actividade investigadora, o desenvolvemento e a innovación universitaria, así como a calidade da educación superior, e en xeral do avance da sociedade a través da formación de novo talento científico e tecnolóxico.

O convenio e os contratos teñen unha duración de tres anos e a dotación económica será integramente sufragada pola Fundación Caixa Rural Galega Tomás Notario Vacas.

A USC é a encargada de realizar a convocatoria, así como de realizar as contratacións e dar soporte á actividade investigadora dos contratados. Igualmente conformará a comisión de avaliación na que participará un representante da Fundación Caixa Rural Galega Tomás Notario Vacas.

Poderán concorrer á obtención destes contratos aqueles estudantes que estean en posesión dun título universitario de grao ou equivalente e de #Máster universitario ou equivalente, que vaian realizar un plan de investigación nalgunha dos catro eixos establecidos na convocatoria, todos eles relacionados co mundo agroalimentario e forestal e a sustentabilidade como eixo transversal. Os eixos ou áreas de investigación serán a produción vexetal e agricultura sostible, a produción e saúde animal sostible, a alimentación segura e saudable e por último a xestión forestal sostible.

A convocatoria está publicada na sede electrónica da USC, onde tamén se poden presentar as solicitudes.

O prazo de presentación de solicitudes será de 15 días naturais desde a publicación da convocatoria na sede electrónica da USC.