Acto de entrega da III Edición de Bolsas de Posgraduado
05/08/2024
IV Edición de Bolsas de Posgrao
29/01/2025
A Fundación Caixa Rural Galega Tomás Notario Vacas colabora coa USC para un proxecto de investigación en acuicultura
A Fundación Caixa Rural Galega Tomás Notario Vacas, acorda coa USC unha achega económica para o proxecto de investigación titulado “Optimización da edición xenética CRISPR/CAS9 para mellorar a resistencia a enfermidades en acuicultura”.
O padroado da Fundación destinou unha achega económica de 25.000 euros para contribuír á dotación de persoal ao proxecto durante un ano.
O proxecto nace dunha colaboración entre os grupos de investigación BioPhysChem e ACUIGEN, no Campus Terra da Universidade de Santiago de Compostela, coa finalidade de optimizar os métodos de introdución de material xenético nas células. Os investigadores perseguen melloras na produción sostible e saúde animal utilizando nanopartículas como vehículos de transporte e combinando técnicas de edición xenética con microscopía de fluorescencia. En definitiva, o obxectivo é conseguir un impacto directo na mellora da saúde animal na acuicultura, un sector crave para a economía galega.
O proxecto está liderado polo investigador postdoutoral Álvaro Jesús Arana Díaz e conta co apoio das investigadoras Laura Elena Sánchez Piñón e Mercedes Novo Rodríguez. Este proxecto tamén conta co interese da empresa DIVERSA, unha spin-off do Instituto de Investigación Sanitaria de Santiago de Compostela (IDIS), que desenvolveu unha tecnoloxía de transporte e introdución de material xenético no interior celular e que será avaliada neste proxecto.
A achega da Fundación destinarase á contratación de persoal investigador por un período dun ano.
A Fundación Caixa Rural Galega Tomás Notario Vacas reafirma o seu compromiso coa investigación e o desenvolvemento científico, nesta ocasión no ámbito da acuicultura, un sector estratéxico para Galicia, e continúa apoiando proxectos que contribúan á mellora da saúde animal e a sustentabilidade.
