Un ano máis a Fundación Caixa Rural Galega Tomás Notario Vacas acaba de facer pública a cuarta edición das bolsas para estudos de posgrao, unha oportunidade única para os universitarios que desexen continuar a súa formación a través de máster ou tese doutorais.

En concreto convócanse dúas bolsas cun límite máximo de dotación de 40.000 euros cada unha para a realización dun máster ou tese doutoral nunha universidade nacional ou estranxeira. A bolsa utilizarase para cubrir gastos de matriculación e aloxamento. O monto final dependerá da localización, o centro e o programa do máster.

Para poder optar a algunha das bolsas, os solicitantes deberán ter un título universitario, ter vinculación con Galicia e podendo ser estudantes recentemente licenciados. Entre as súas prioridades iniciais está a convocatoria de bolsas para a realización dun máster coa finalidade de formar a profesionais nos centros máis vangardistas co propósito de que poidan achegar coñecemento ao tecido industrial galego.

A selección dos bolseiros basearase en criterios como a formación académica previa do solicitante, a traxectoria profesional, no caso de que exista e o proxecto de estudos a realizar, así como a súa aplicación posterior prevista.

Actualmente o prazo de solicitude estará aberto ata o 31 de maio e as solicitudes do mesmo xeito que as bases desta convocatoria poderán atoparse na nosa páxina web www.fundacioncruralnotario.gal no apartado de convocatorias.